1. iTunes免費但冇得揀救邊類檔案

相信用得iPhone嘅讀者，都知道可以用iTunes去救番手機鏟除咗資料，小編唔詳細介紹點用喇。不過呢個方法有三個弊處，第一梗係等候時間太耐。例如小編嘅iPhone 11因為從來冇喺手提電腦做backup，於是iTunes每次備份都要差不多30分鐘，講緊只係20多GB嘅資料，如果你用Pro Max有200幾GB數據要備份，唔敢想象要等幾耐。第二係冇得揀你要恢復邊嘅數據，例如小編測試時，只係刪除咗幾張相片、一個whatsapp群組入面嘅相片等，但iTunes唔理你，將你手機所有數據復原，於是又要嘥我20幾分鐘！最後係手機都有麻煩，例如部分apps要更新，apple ID要重新確定、FaceID要再影過相等等，簡單嚟講，用 iTunes雖然免費，但又煩又耐又冇得揀。跟住小編推介三款「救機軟件」，令你又快、無痛苦兼可以揀復原邊啲資料，不過部分要付費先用到全部功能。

2.FoneDog Toolkit for IOS救到超多類型檔案

FoneDog Toolkit for iOS有好強大嘅「起死回生」能力，除咗一般嘅相片、短片、SMS、聯絡人救得番，連通訊軟件例如whatsapp、wechat、messenger嘅訊息，或者語音備忘錄(即係你用iphone嚟錄音、或文字記低重要嘅資訊)一樣復原到！佢支援支持iPhone 5以上手機，及所有型號的iPad Pro，iPad Air，iPad mini和最新的iPad12。不過收費都幾貴，分三類：一個月、一年或者終身使用，收費由90至111美元。

操作方法

首先用數據線連接iPhone，然後啟動FoneDog Toolkit for iOS程式，佢會俾你揀ios數據恢復、ios系統恢復、ios備份及復原以及新功能:Whatsapp備份及恢復。你想救番刪除咗資料就要揀ios數據恢復。

程式跟住要你揀要恢復邊類檔案，例如SMS、相片短片音樂、定係第三方嘅通訊apps，小編建議唔好全選，諗清楚你要救番咩資料先好揀，可以幫你慳返唔少掃描時間。

然後FoneDog Toolkit for iOS會掃描你部iPhone，呢度都要20分鐘左右，你可以去沖杯咖啡歎吓先！

最後你會見到類似windows嘅介面：左邊俾你揀類型，右邊就係該類型嘅所有檔案。你可以睇住預覽，要救邊張相、邊個whatsapp訊息就剔佢，揀好咗撳復原就完成。

小編心得

小編雖然只係試咗試用版，但都感受到FoneDog Toolkit for iOS比起其他同類軟件有更強嘅恢復能力，尤其係可以搵番已刪除嘅whatsapp訊息及相片，呢樣就唔係每一個救機程式做得到。另外佢操作好簡單，手機與電腦連接後，撳掃描等半個鐘左右，然後就可以揀復原邊啲資料，好適合新手使用。缺點就係佢冇將whatsapp入面嘅相片分番唔同群組，又唔係依時間排序，你要逐張逐張去睇邊一張係你想要嘅，如果你whatsapp存咗大量相片，呢度就要好花時間了。另外佢收費都幾貴，一個月90蚊美元，即係港紙七百蚊有多。對小編而言，除非刪咗嘅資料真係冇咗就世界末日，否則錯手鏟除咗，就let it go, let it go！

3. Wondershare Dr.Fone勝在操作簡單

如果你嫌FoneDog Toolkit for IOS太貴，可以考慮呢個叫Wondershare Dr.Fone，俾39.95美元就買到恢復手機資料嘅工具，俾多21.95美元有埋救whatapp嘅程式。如果你捨得俾100美元，就買到全部功能，包括資料復原（恢復刪除的連絡人、 短信、 照片、 筆記、 語音備忘錄、 Safari書簽）、手機管理、手機資料傳輸、WhatsApp/LINE等通訊軟體資料備份、解鎖螢幕密碼、系統修復、手機資料備份、資料安全抹除、iTunes修復等等。Wondershare Dr.Fone操作方法同FoneDog Toolkit for iOS好似，都係先掃描然後揀恢復咩資料，又係新手都識得點用。

操作方法

首先用數據線連接iPhone，然後啟動Wondershare Dr.Fone程式，跟住你會睇到程式主頁，有12個功能俾你揀，第一個就係數據恢復。要小心唔好揀最後果三個功能，因為要下載其他程式。

數據恢復有四個方法: 從手機、iCloud、iTunes恢復番資料，或者密碼管理，我地當然揀第一項，記得手機要先接駁電腦。

然後再揀你想恢復手機邊啲資料，有好多選擇，例如圖片、聯絡人、safari書簽、錄音、whatsapp附件等，小編建議係你想恢復邊樣就click果樣，千祈唔好貪心一次揀幾樣，因為小編試過揀圖片同埋whatsapps，結果只掃描到圖片資料，whatsapp顯示係零！小編只好退出然後單剔whatsapp，然後Wondershare Dr.Fone先幫我搵番手機嘅whatsapp資料。

小編心得

呢隻軟件收費平過FoneDog Toolkit for IOS，但冇咁好用，例如小編嘗試恢復某些whatspp訊息，佢顯示唔到成句，只係睇到開頭幾個字然後全部變晒XX，唔知係唔係要俾咗錢先會睇到全句訊息？另外掃描whatsapp訊息需要一些時間，程式會顯示沒法顯示，鼠標又變咗漏斗，你唔好以為佢hang咗機呀，等一等就會睇得番。要讚係圖片預覽夠大張，俾你睇清楚唔使救錯相，而且係順番時間先後排序，比較容易搵到相。

4. FonePaw Android可以救到sim卡記憶卡資料

如果你係用安卓手機，可能要用到sim卡或記憶卡去儲存資料，咁誤刪嘅機會仲大過用iPhone，所以你需要專門設計俾安卓救機用嘅軟件，小編推介大家用FonePaw Android。介面、操作方法同FoneDog、Dr.Fone大同小異，都係掃描完俾你揀邊啲資料可以恢復，針對支援接入SD卡嘅安卓手機，FonePaw可以掃描你部手機嘅記憶卡，然後恢復丟失資料。如果你唔小心刪咗SIM卡儲存聯絡人資料，包括詳細姓名、電話號碼、電郵地址等，統統都可以復原。另外使用安卓手機，可能需要Root或者刷機，萬一失敗咗，FonePaw都可以幫手機去番未Root前嘅狀態。最後係佢掃描時間快過FoneDog、Dr.Fone，等幾分鐘就ok，亦都唔需要你之前已經備份過手機資料，完全係即插即用即救。它有三個付款計劃，月費237港元、年費321港元、終身只需405港元，仲平過iPhone用嘅救機軟件呢。