唔好信出廠模式

有幾多人係買咗部電視，從來只用出廠嘅影像模式去睇電影呢？可能為數唔少啩，原來出廠模式好多時未必係最佳畫質嘅模式，如果我們想盡享高清電視嘅最佳畫質，就要拎起電視遙控器去做細節啲嘅調校，如果跟住小編做，就算唔係專家都可以調出最佳嘅畫質出嚟。

用電影模式測試電視睇戲嘅真實表垷

大家去買電視機嘅時候，盡量唔好靠喺電器舖見到嘅畫質去判斷邊部電視靚，因為好可能部部機都有唔同嘅調校，未必係調到最靚嘅俾你睇。

一部好嘅電視機，應該有好多畫質上嘅細節調校，所以在選擇電視機時，不妨打開調校頁，睇下電視提供幾多項嘅調校，亦可以比較下內置嘅不同畫質預設模式。在各種預設模式，如果你買電視主要係用來睇戲嘅話，如果有電影模式選擇的話，就可以用它來測試電視機睇戲嘅真實畫質，小編亦推薦大家喺選購電視機嗰陣，要求店員將每部電視都調去電影模式做比較（當然唔係每個牌子都有電影模式選擇嘅）。

仲有一點，大家亦要注意，就係喺電器舖睇嘅電視畫面，好多時都係調到去最鮮艷同最強化嘅模式，令佢嘅畫面特別搶眼，但同樣嘅調校若喺屋企環境睇，可能係好差嘅效果，甚至睇得特別眼攰。

原廠預設嘅電影模式，都係以真實重現電影畫質去預調，睇慣加強模式或出廠模式嘅人，初看電影模式，都會覺得畫面會偏柔、偏紅（亦可以講係偏暖）。其實，電影模式至係最貼近導演想要嘅影像效果。其餘如運動模式、動態模式、生動（Vivid）等類似嘅模式，出嚟嘅效果好搶眼，好Sharp，但又係導演或電影製作人最唔想要嘅效果。如果，大家想喺屋企享受到電影院出嚟嘅影像效果，就要避免用呢類增強模式。

調校最有電影感嘅五個基本步

一般電視機都有五項主要嘅畫面調校選項（可能有少部分好特別嘅型號係無嘅），分別係色溫、光暗、運動平滑（或叫運動插值）、對比、銳化。我哋最好用一部製作特別精細嘅4K電影作參考，拎起電視遙控器開始調校。

畫面光暗同對比要見細節

第一項我們先校畫面嘅光暗同對比，喺LED嘅話，我哋都叫背光（Backlight），而OLED就無背光嘅，而係控制OLED嘅光度。

好多人都鍾意將電視有咁光調到咁光，其實，畫面太光會睇到人眼攰甚至頭痛，而且仲會特別嘥電，有啲型號仲會令電視機提早老化。

請記住，調校光暗時，應係先睇暗位，我地由最暗開始校，校到啱啱好睇到暗位嘅細節，然後我哋再望光位，繼續向上調，調到光位都可以保持細節為止，如果調多一度光位就消失咗細節，咁我哋調番低一度就剛剛好。

總括嚟講，就係最暗位同最光位都見到細節就係最理想嘞。

光暗同對比嘅調校都係用同一法則就無錯，太光或太高對比都係要避忌。

畫面唔係愈銳利愈好

好多人都覺得部電視機要夠Sharp，但係Sharp唔等於銳利，而係要清晰同細節分明，所謂畫面銳利，我地會覺得啲線條硬到好似會𠝹傷人咁，其實咁嘅畫面效果係唔靚同唔襟睇嘅。

其實，電視機嘅銳利度調校，係一種人工強化功能，係數碼化嘅銳利感，所以，我地應該將佢設定為0，即係唔加任何人工銳化效果，又或者可以上下加減1 度。其實，如果想感受電影院看電影嘅效果，校得柔和一點更好，請記住，畫面追求嘅係精細，而唔係銳利。

係調校銳利度時，我們留意嘅細節位最好係皺紋或者衣服嘅紋理。

顏色同色調保留原廠設定

調校顏色，其實就係調校顏色嘅飽和度，而調校色調，也可以講係調校畫面偏紅還是偏綠。

除非你對顏色有特殊嘅偏好或要求，一般嚟講，原廠嘅設定都已經好準（有時我哋睇到電視偏色，係因為電視用得太耐老化或者壞咗啫），特別係用電影模式去睇嘅時候，就同真實無乜分別。如果真係想調校嘅話，最多係加減一至兩度嘅分別。

色溫（白平衡）係會被大腦所騙嘅

學過影相嘅，都好明白色溫或者白平衡係乜，簡單講，如果我們調高畫面就會偏藍，調低就會偏紅，我地又可以講係暖調同冷調。

而色溫仲有一個特點，就係我哋雙眼（其實係大腦）會自動適應，即係話，無論係乜嘢色溫，我哋都會看到一樣嘅白色（所謂白平衡就與此相關），自動調節後，感覺唔到偏藍或偏紅。原來，廠家為咗畫面更能吸引人，往往喺出廠調校上都盡量將畫面調光，將色溫提高（即偏藍），但呢個唔係睇電影用嘅最佳畫質。所以，當我地將預設畫面調到電影模式，一開始雙眼會唔習慣，覺得畫面偏紅同比較暗，好似唔夠Sharp，但當我們習慣咗色溫後，就可以感受到真實嘅電影效果。你可以做個實驗，當我們睇多幾日，再將預設模式轉番標準後，你會突然發覺畫面好藍，睇落唔夠靚添。

消除鬼影無曬電影感

電視會受更新率影響，當我地睇高速移動嘅畫面嗰陣，如果電視唔係高更新率型號（120Hz及240Hz），好容易會睇到鬼影，所以電視都有一個功能叫motion smoothing或者係motion interpolation。其實，係畫質控制系統會喺Frame同Frame之間，產生模擬出來嘅新Frame，令高速移動概畫面看起嚟更順滑，同埋令鬼影消失。如果我哋睇一啲運動片或者用高幀率嘅攝影機拍嘅電視節目，可能會睇得好順，但如果係用嚟睇大電影嘅話，就會覺得缺乏咗電影感，似睇高清嘅YouTube視頻，Tom Cruise就喺Twitter講過，最憎用加咗motion smoothing效果去睇自己嘅電影，覺得好假無電影感。

所以，各位電影迷，記住關咗motion smoothing先好去睇Tom Cruise嘅《Top Gun: Maverick》同佢嘅經典舊片啦。