成交量低無可低 才有機會撤辣

有傳媒問我，既然我睇好樓樓，點解最近唔買樓，我認為傳媒的講法太偏激，我並不是睇好樓市，而事實上在現時環境下，利息又高，又有辣招，應該冇人睇好樓市，而我亦不例外，但我並不是睇唔好樓市，而是不擔心，而且我知道．只要政府撤辣，樓市便會有翻天覆地變化，我唔買樓只是迫政府撤辣方法之一，只要大家唔買唔賣，成交量長期處於極低水平，唔輪到政府話唔撤，如果唔撤辣就撤人，特首亦熟讀三國，知道曹操怎樣對待運糧官，暫借人頭一用是一個很經典故事，所以，香港官員知道，如果唔想最後被中央政府撤職，最好方法就是現在撤辣。

近日二手樓成交量極低，雖然一手樓亦唔好得去邊，但相比二手樓仍然是好了一大截，對上一個週末，十大屋苑只得一宗成交，對於物業代理來說當然不是好事，但對於買賣雙方似乎又沒有什麼問題，對於收租業主更加冇所謂，有能力有需要的人唔買樓，對租金有支持，所以近日樓宇發展是租金上升，樓價下跌，並不是收租的是無良業主，只是供求問題，而租金不斷上升，最後亦會在樓價反眏出來，就算政府唔撤辣，樓價最終亦會隨租金上升，所以，政府是否撤辣，有樓的人並不是太過在意。

政府出招已經超過10年，但從來沒有講幾時或者在什麼情況下才會撤辣，究竟政府幾時會撤辣，我夠膽講，當成交量低無可低的時候，政府就要撤辣，而政府最近推出的9成按保，就是盡最後努力提高成交量，但效果似乎很微，估計政府在不日就會撤辣，如果大家想加快撤辣速度，最有效方法就是打算買樓的人唔買，業主唔賣樓，成交量下降，政府必然會撤辣。